常見六款葡萄酒 邊款最啱新手飲?

想飲靚酒唔係吓吓都要開支「82年lafite」嘅!對於新手而言,主觀嘅品味經驗比葡萄酒牌子同年份更加重要。初嚐葡萄酒建議大家先了解自己嘅口味喜好,認識喜歡嘅葡萄酒種類,再挑選唔同地區、牌子、年份,由淺入深地學習品味葡萄酒,而第一步當然要物色好飲易入口嘅葡萄酒啦!合興隆為大家精選 6 種入門級葡萄酒,俾葡萄酒新手都可以感受品酒嘅樂趣。

白酒

Riesling

Riesling (雷司令)係源自德國萊茵地區嘅白葡萄品種,口味偏酸,不會過於甜膩。氣味大多帶有青檸、檸檬、香桃等果香味,非常適合夏天品嚐。

甜度:⭐️⭐️⭐️

酸度:⭐️⭐️⭐️⭐️

酒精濃度:約8 – 10%

Sauvignon Blanc

Sauvignon Blanc(長相思)原產自法國,後來發展至紐西蘭、澳洲等地亦有出產。口味方面,酸度較高,甜度非常低。紐西蘭、澳洲出產嘅「新世界」Sauvignon Blanc則帶多一點甜味。氣味帶有草本嘅味道,例如青椒、青瓜、西柚及柑橘等果香。

甜度:⭐️⭐️

酸度:⭐️⭐️⭐️⭐️⭐️

酒精濃度:約12 – 13%

紅酒

Merlot

Merlot(梅洛)原產自法國波爾多,美國、澳洲、智利等地亦有出產。甜度及酸度適中,入口柔順不澀,帶有黑色水果風味,如黑莓、黑李子、黑櫻桃等,喺眾多紅酒品種當中屬較易入口。

甜度:⭐️⭐️⭐️

酸度:⭐️⭐️⭐️

酒精濃度:約12 – 15%

Pinot Noir

Pinot Noir(黑比諾)原產地為法國勃艮地。入口柔順不澀,味道略酸。酒嘅顏色較淺,呈寶石紅色,並帶有紅色水果風味,如櫻桃、莓果等

甜度:⭐️⭐️

酸度:⭐️⭐️⭐️⭐️

酒精濃度:約14%

氣泡酒

Prosecco

Prosecco產自意大利東北部,價錢相宜又好飲,因而被尊稱為意大利「國民飲品」。口味方面甜酸度適中,並帶有新鮮花果香,口感清爽。

甜度:⭐️⭐️⭐️

酸度:⭐️⭐️⭐️

酒精濃度:約11%

Moscato

以白麝香葡萄釀製嘅Moscato 香氣非常濃郁,帶有濃郁白葡萄香氣,仔細品嚐亦有柑橘、玫瑰、荔枝、水蜜桃等香氣。味道偏甜微酸,非常適合初嚐葡萄酒嘅朋友。

甜度:⭐️⭐️⭐️⭐️

酸度:⭐️⭐️

酒精濃度:約7-12%

啤酒是怎樣煉成的?

【啤酒是怎樣煉成的?一文睇清常見啤酒種類】

個個都飲啤酒,唔通個個都識飲啤酒咩?到底啤酒除咗顏色上嘅不同,仲有咩分別?事實上,使用唔同發酵方式及原料釀造,啤酒可以千變萬化,味道都差天共地。所以要搵出最啱自己嘅啤酒口味,先學識分清楚啤酒種類喇!

原來!啤酒種類取決於發酵方式。
啤酒嘅主要成份包括酵母、水、啤酒花及麥芽為主。能夠衍生出唔同口味,則取決於唔同嘅發酵溫度、方式同酵母,以及額外添加嘅原料。


接下來就為大家介紹各式各樣嘅啤酒款式~~

Lager(拉格)

Lager 可以話喺市面上最常見嘅啤酒種類。Lager以「下層發酵法」製作,發酵溫度較低,因此發酵時間亦較長。採用 Lager 方式釀製嘅啤酒味道較清新,原料的味道比較突出,容易入口,保存期限都相對長。因為符合大多數人的口味,Lager亦是市面上最常見的啤酒,初嚐啤酒嘅朋友好容易就接觸到同埋入坑!

Stout(司陶特)

Stout 大家未必熟悉,但「健力士」就一定聽過,健力士啤酒就係以Stout聞名,亦即係常見嘅黑啤。顏色之所以呈深啡色,主要原因係由烘焙過嘅麥芽釀製而成,口味亦因此帶點煙燻、咖啡或巧克力等味道,入口較厚身,味道濃烈。初初試就未必會喜歡,不過一旦愛上黑啤嘅性格,就返到轉頭!

Wheat(小麥啤酒 )

小麥啤酒可以話喺啤酒界的新寵兒,帶有豐富花果香及柑橘類香氣,簡單易飲,有啲仲帶有微微甜度,真喺男女通殺!小麥啤酒普遍稱為白啤,因為加入咗小麥而令酒身帶有微微白色,細分仲可以分為:德式小麥啤酒 (Weissbier)及比利時小麥啤酒 (Witbier),兩種的風格都是低苦味、清爽、且帶有香料味,容易入口又怕啤酒苦味嘅朋友必選!。 

Altbier(德國老啤酒)

Altbier 係一種混合型啤酒,使用 Ale(愛爾酵母)嘅發酵溫度,並加入拉格啤酒(Lager)嘅低溫熟成程序。Altbier 酒精含量通常為 4.7% 至 4.9%。酒體呈琥珀、古銅色,泡沫堅實。苦味雖然高,但麥芽香氣十分豐富,鐘意德國啤嘅朋友絕對不容錯過。

Pilsner(皮爾森式啤酒)

源自於德國嘅 Pilsner 採用「下層發酵法」,酒精濃度不高。酒體呈清澈金黃色,口感純淨,帶有薩茲酒花(Saaz)嘅香氣及明顯麥香,入口會感受到豐富的氣泡感及甘苦味。

More Tipsy Knowledge...